《願我十八廿二就懂的事》（五）
1. 冇嘢比「完美」更加無撚聊。
2. 少說話係真，但唔一定要多做事，衝動下來做嘅事往往令人後悔。「少說話，多思考」會比較好；少說話，少個機會向其他人表現出自己嘅無知。多思考，多個機會發現自己原來有幾無知。
3. 唔好亂咁抆條眉。
4. 細個成日會因為啲情情愛愛嘢而搞到情緒好波動，覺得同對方有咩爭拗就世界末日。大個先知，原來我嘅情緒並唔等於我自己。要同情緒好好相處，但唔代表要俾情緒支配。
5. 凡親有事諗唔通，我都會走去瞓覺，Sleep on it。瞓醒之後就算問題仍然解決唔到，都會有種「都冇咩大不了」嘅體會。
6. 其他人點諗你、點睇你，其實與你無關。
7. 世間太多是是非非，別人嘅閑事私事最好少理。倒不如將精力時間花喺自己身上。唔好唔記得呀，我哋每個人喺呢個星球嘅時間都有限。
8. 試下下次同另一半吵大獲時唔好喊。
9. 原諒嗰啲曾經傷害你嘅人吧，包括你自己。唔關大唔大量事，因為「原諒」從來唔係畀其他人，係畀自己㗎。
10. 唔好一無聊就拎部電話出嚟漫無目的咁鳩碌耷低頭聽歌。多啲觀察身邊嘅事，多點聆聽，容許自己放空下。
11. 因為知道貓貓能夠同我一齊嘅時間有限，所以我每日都會瘋狂讚佢、錫錫佢，同埋提佢我有幾愛佢。其實人世間一切事物都有時限，要用同樣態度面對先得。
12. 唔講住喇，打俾老母。
Instagram : sis3ter
Search